News Home     Site Home

மேட்டூர் அணையில் மூழ்கியுள்ள கோவில்கள்!!!

மேட்டூர் அணை கட்டுமான பணியின் போது, அணையையொட்டி அமைந்திருந்த நூற்றுக்கணக்கான கிராமங்கள் அப்புறப்படுத்தப்பட்டன. அப்போது கீரைக்காரனூர் பகுதியில் வீரபத்திரன் சுவாமி கோவில் இருந்தது. பின்னர் அந்த கோவில் அணையில் தேங்கிய தண்ணீரில் மூழ்கி விட்டது. இதே போல் அணையையொட்டி பண்ணவாடி பகுதியில் உள்ள கிறிஸ்துவ ஆலயத்தின் இரட்டை கோபுரங்களும், ஜலகண்டேஸ்வரர் கோவிலும் நந்தி சிலையும் தண்ணீரில் மூழ்கின. அணையின் நீர்மட்டம் 70 அடிக்கு கீழே குறையும் போது, பண்ணவாடி பகுதியில் கிறிஸ்துவ ஆலயம், ஜலகண்டேஸ்வரர் கோவிலும், நீர்மட்டம் 44 அடிக்கு கீழே குறையும் போது கீரைக்காரனூர் பகுதியில் உள்ள வீரபத்திரன் கோவில் கோபுரமும் வெளியில் தெரியும்.

தற்போது 9 ஆண்டுகளுக்கு பிறகு மேட்டூர் அணையின் நீர்மட்டம் 31.70 அடியாக குறைந்ததால், கீரைக்காரனூரை ஒட்டியுள்ள வீரபத்திரன் கோவில் கோபுரத்தின் 2 நிலைகள் வெளியில் தெரிகின்றன. 7 நிலைகளை கொண்ட இந்த கோவிலின் முன் மண்டபம் சுமார் 20 அடி நீளத்தில் அமைக்கப்பட்டுள்ளது.

இதே போல் நீர் மட்டம் குறையும் போது வெளியே தெரியும் ஜலகண்டேஸ்வரர் கோவிலையும் பிரம்மாண்டமான நந்தி சிலையையும் படத்தில் காணலாம். இப்படத்தில் உள்ள மற்றொரு பாறை போன்ற அமைப்பு அக்காலத்தில் ராஜாக்கள் கோவிலுக்கு வந்து வழிபாடு செய்துவிட்டு கோட்டையூரில் உள்ள கோட்டைக்கு செல்ல பயன்படுத்திய சுரங்கபாதையின் முகப்பு கோபுரமாகும். இந்த கோவில்கள் அனைத்துமே 200 ஆண்டு கால பழம்பெருமை வாய்ந்தவையாகும்.

நீர்மட்டம் மேலும் குறைந்தால் இந்த கோவிலுக்கு வரும் மக்கள் கூட்டமும் அதிகரிக்கும் என்று அந்த பகுதி பொதுமக்கள் தெரிவித்தனர்.

-ராதிகா கணேசன்

Share

Leave a Reply